Xocalı soyqırımının bütün dünyada tanıdılması, hadisəyə hüquqi qiymət verilməsi üçün Azərbaycan dövlətinin zəruri tədbirlər gördüyünü bildirən rektor G.Gəraybəyli qeyd etdi ki, soyqırımı törədənlərin cəzalandırılacağı gün yaxındadır.

ATU-nun İnsan anatomiyası və tibbi terminologiya kafedrasının professoru, Xocalı sakini Mübariz Allahverdiyev soyqırım zamanı ailəsinin başına gələnlərdən danışdı. O, əliyalın insanların göstərdiyi şücaətlərdən söz açdı. Bildirdi ki, Xocalının vətənpərvər, qürurlu, yenilməz, əyilməz qəhrəman övladları haqqında hələ yazılmamış çox məqamlar var. 
Xocalı hadisəsinin digər şahidi - ATU-nun Mikrobiologiya və immunologiya kafedrasının dosenti Səidə Zeynalova da həmin gecə baş verənlərdən danışdı. O, Xocalı soyqırımının miqyasına görə bəşər tarixində ən ağır etnik təmizləmə aktı olduğunu vurğuladı.

Universitetin I müalicə-profilaktika fakültəsinin III kurs tələbəsi Aysun Məmmədli isə Xocalı faciəsinin tanıdılması, soyqırım qurbanlarının hüquqlarının müdafiəsi üçün gənclərin görə biləcəyi işlərdən söz açdı.

Toplantıda ATU-nun Tələbə Həmkarlar İttifaqı Komitəsi tərəfindən hazırlanmış Xocalı soyqırımına həsr edilmiş film nümayiş etdirildi.