Xəbərlər
Azərbaycan Tibb Assosiasiyasınn Cərrahiyyə Dərnəyinin I Beynəlxalq Simpoziumu
06.12.2018
Bu gün Hyatt Regency otelində keçirilən 150 -dən artıq həkim cərrah və onkoloqların iştirak etdiyi Azərbaycan Tibb Assosiasiyasınn Cərrahiyyə Dərnəyinin I Beynəlxalq Simpoziumu uğurla başa çatdı.
Açılışda Azərbaycan Tibb Assosiasiyanın sədri Dr. Nəriman Səfərli çıxış etdi və öz çıxışında Assosasiyanın fəaliyyəti haqqında iştirakçılara məlumat verdi. Növbəti çıxışda Cərrahiyyə Dərnəyinin sədri, tibb üzrə elmlər doktoru Pərviz Abbasov qeyd etdi ki, Azərbaycan Tibb Assosiasiyanın nəzdində fəaliyyət göstərən 30-dan artıq ixtisas üzrə dərnəklərdən biri də Cərrahiyyə Dərnəyidir. Dərnəklər tərəfindən mütəmadi olaraq keçirilən elmi-praktik simpoziumların və konfransların təşkilində əsas məqsəd həkimlərin ixtisas üzrə peşəkar təcrübələrinin artırılması və akademik biliklərinin təkmilləşdirilməsidir.
P.Abbasov son illər Səhiyyə Nazirliyi tərəfindən aparılan islahatlar nəticəsində 2017- ci ilin sonundan etibarən həkimlərin Davamlı Tibb Təhsili üzrə təkmilləşmə sistemi beynəlxalq standartlara uyğun şəkildə tətbiq olunmağa başlandığını vurğuladı.
«Biz, Cərrahiyyə Dərnəyinin il ərzində mütəmadi keçirəcəyi simpoziumlarda peşəkar mütəxəsislər, o cümlədən xaricdən dəvət olunan tanınmış alimlərin tərəfindən təqdim olunan məruzələr cərrahların peşəkar fəaliyyətində faydalı olacağına inanırırq. Həmçinin həkimlərin bu cür elmi-praktiki tədbirlərdə mənimsədikləri akademik biliklər xəstələrə göstərilən tibbi yardımın keyfiyyətinin artmasına zəmin yaradır».
Cərrahiyyə dərnəyinin 1- ci Beynəlxalq Simpoziumunda onkoloji panel üzrə ölkəmizin aparıcı cərrahları və onkoloqları, həmçinin Turkiyədən dəvət olunmuş İstanbul Bilim Universitetinin tanınmış mütəxəssisləri cərrahiyyə və onkologiya sahəsindəki ən son nailiyyətlərdən və müasir müalicə metodlarından danışdılar. İstanbul Bilim Universitetinin professoru Dr. Murat Cantaşdemir “Qaraciyər şişlərində invaziv radiologiya müalicəsi” adlı mövzu ilə çıxış etdi. Həmin universitetin professorları Dr. Güneyt Türk və Dr. Abdullah Yakupoğlu müasir invaziv radiologiyanın, nüvə təbabətinin nailiyyətlərinin cərrahiyyə və onkologiyada tətbiqi ilə bağlı məruzə etdilər.
Milli Onkologiya Mərkəzi nəzdindəki Nüvə Təbabəti Mərkəzinın rəhbəri t.ü.f.d Dr.Fuad Novruzov “Onkologiyada yeni üfüqlər: PET-KT” adlı maraqlı təqdimat etdi.
Növbəti məruzəçilər Azərbaycan Tibb Universiteti onkologiya kafedrasının dosenti t.ü.f.d, Dr. Nigar Mehdiyeva “Hormon pozitiv süd vəzisi xərçənginin müalicəsi” mövzüsunda, Milli Onkologiya Mərkəzindən T.ü.f.d., Dr. Samir Qurbanov “Süd vəzi xərçəngində orqanqoruyucu və rekonstruktiv cərrahiyyə” mövzusunda və Dr. Nigar Əliyeva “Yoğun bağırsaq xərçəngönü xəstəliklərinin diaqnostikası və müasir endoskopik müalicə üsulları” adlı maraqlı mövzularda məruzələrlə çıxış etdilər. Mövzular ətrafında müzakirələr aparıldı.
I Beynəlxalq Simpoziumun da elmi proqramı Səhiyyə Nazirliyinin Elmi Tibbi Şurası tərəfindən akkreditasiyadan keçirilmişdir və elmi-praktiki simpoziumda iştirak edənlərə Davamlı Tibbi Təhsil üzrə kredit vahidləri qeyd olunmuş sertifikatlar təqdim olundu.
