Xəbərlər

ATU-nun Onkoloji Klinikasında nadir əməliyyat icra edilib.

27.01.2018

Bu yaxında 43  yaşlı Bakı sakini N.Quliyev ATU-nun Onkoloji Klinikasına sağ bazunun yuxarı hissəsinin üçdə birində olan törəmə, ağrı və bazu oynağının funksiyasının pozulması şikayəti ilə müraciət etmişdi. Klinikanın tibb heyəti xəstəyə diqqət və qayğı ilə yanaşdı, ətraflı müayinələr aparıldı. Klinik, MRT və histoloji müayinələrdən sonra N.Quliyevə “sağ bazu sümüyünün xondrosarkoması” diaqnozu qoyuldu.

Qeyd edək ki, sümük şişləri yayılma tezliyinə görə onkoloji xəstəliklərin yalnız 1 %-ni təşkil etsə də, aqressiv klinik gedişi və erkən metastaz vermə xüsusiyyətlərinə görə fərqlənir. Ona görə də xondrosarkomaların əsas müalicə yolu kimi cərrahiyyə əməliyyatı seçilir. Amma adı çəkilən xəstədə törəmənin yerləşdiyi yer və yayılma xüsusiyyəti cərrahi müdaxiləni texniki cəhətdən olduqca mürəkkəbləşdirirdi.

Nəticədə əməliyyat prosesinə akademik Əhliman Əmiraslanov özü rəhbərlik etdi. Xəstə üzərində səhiyyə aləmində nadir əməliyyatlardan sayılan “sağ tərəfli döş-kürəkarxası rezeksiya” əməliyyatı aparıldı. Hal-hazırda xəstənin vəziyyəti kafidir. Onu da qeyd edək ki, ATU-nun Onkoloji Klinikasında icra olunan bu cərrahiyyə əməliyyatı Azərbaycanda həyata keçirilən nadir əməliyyatlardandır.